Lushaugen

Tur i Toscana

Første kommunen på Austlandet var Gran på Hadeland, eit område med bølgjete, mjuke og vakre landskap, eller Noregs Toscana, som søskjenbarnet mitt (og andre) kallar det. Men turen frå Lygnasæter til Lushaugen, nær Hurdal, ga nok ikkje dei sterkaste assosiasjonar til Toscana, med granskog og myrer rundt ruta det meste av turen. Fint var det likevel, med topp sommarvêr (om enn litt vind). På toppen er det eit utsiktstårn som løftar deg over skogen og gir vidt utsyn i alle retningar. Men høgdeskrekken min gjorde at eg syntest det var høgt nok på det nest øvste nivået av tårnet :-) Gran er ein middels stor norsk kommune, litt større enn medianen når det gjeld areal og greitt innanfor dei 100 største etter folketal med sine bortimot 14 000 innbyggjarar. I kommunen er det mykje historie å få med seg for den som er interessert, m.a. søsterkyrkjene på Granavolden. Og kommunen har den einaste heilårsdrivne innlandsferja i landet; ruta Horn - Tangen kryssar Randsfjorden lengst nord i kommunen. Fun fact: Etter dei siste fylkesendringane har Gran blitt separert frå sine to vener på Hadeland; Gran i Innlandet fylke og Jevnaker og Lunner i Akershus. Dette var såpass upopulært at Gran no har fått Stortinget med på at dei får gjenoppta samlivet med dei to andre i Akershus. Men - overraskande nok møtte dette motstand på Nordlands-benken i Stortinget. Grunnen er at flyttinga ville føre til at Nordland ville tape eit stortingsmandat til Akershus, ved at Akershus ville fått knappe 14 000 gransokningar med på laget før neste val. Litt seinare i prosessen vart det klart at Nordland nok ville tape eit mandat uavhengig av dette, så dermed roa debatten seg.